Шайлообек Атазов чек арачы Эламан Ураимов тууралуу патриоттук тасма тартууну сунуштоодо
Жогорку Кеңештин жыйынында депутат Шайлообек Атазов Тажикстан менен чек арадагы жаңжалда баатырларча курман болгон аскерлердин элесин түбөлүккө калтыруу маселесин көтөрдү.
Депутаттын айтымында, патриоттук роликтерди, маркумдардын эрдигин, мисалы Эламан Ураимовдун окуясын чагылдырган тасмаларды тартуу зарыл. Бул, депутаттын айтымында, туура идеологияны түзөт.
"Бул окуяларды көптөр Баткен окуясы деп аташат, бирок жок, Баткенде согуш болгон. Биз протоколдук тапшырма берип, баатырлар тууралуу патриоттук тасма тартуу жана бул тасманы элге, мектеп окуучуларына көрсөтүү боюнча кат жөнөткөнүбүзгө жети ай болду. Бирок буга Маданият министрлиги, тиешелүү түзүмдөрдүн жетекчилери көңүл бурбай жатышат. Эламан башкалардын өмүрүн сактап, өзүн граната менен жардырып, ошону менен аларды душмандан коргоп калган. Бул тууралуу тасма тартууну суранганбыз.Качан мамлекетте туура идеология болуп, өсүп келе жаткан муунга туура тарбия берилсе, мамлекет ошондо өнүгөт",-дейт Атазов.
Эске салсак, Тажикстандын Кыргызстандын аймагына куралдуу басып кириши учурунда 29 жаштагы капитан Эламан Ураимов күжүрмөн тапшырманы аткарып жатып каза болгон.
