Ошто жапырт ууланган окуучулардын абалы айтылды
Ошто 29-мартта 43 окуучу белгисиз нерсеге ууланган. Саламаттыкты сактоо министрлигинен бүгүн, 30-мартка карата 5 окуучу ооруканада жатканын маалымдады.
Ош облустар аралык балдар клиникасынын акыркы маалыматы боюнча, Кара-Суу районундагы №101 орто мектебинин окуучулары "Тез жардам" менен жеткирилген. 43 окуучу реаниматолог, травматолог, невропатолог, окулист, кардиолог, аллерголог, педиатрдын кароосунан өтүшкөн. Алардын абалдары канааттандырарлык деп бааланган.
43 баланын (2009-2011-жылдары туулган) ичинен 18и ооруканага жаткырылган. Бүгүн, 30-мартта 13 бала амбулатордук дарыланууга жөнөтүлдү.
Ал эми Билим берүү жана илим министрлигинен аталган окуя боюнча райондук билим берүү бөлүмү мугалимдер жана ата-энелер менен жыйын өткөрөрүн маалымдашты.
Азырынча окуучулардын ууланышынын себеби айтыла элек.
Сүрөт иллюстрациялык.
