Япониянын премьер-министрине кол салуу болду
Жардыруу Япониянын премьер-министри Фумио Кисиданын Вакаямадагы Сайгасаки балык уулоо портунда сүйлөгөн сөзүнө жакын жерде угулганын NHK билдирди. Окуя болгон жерден өкмөт башчы тез арада эвакуацияланган. Жабыркагандар тууралуу маалымат жок. Кисида жаракат алган эмес.
Asahi телеканалы укук коргоо органдарына таянып, окуя болгон жерден бир адамды кармаганын, жарылуудан бир мүнөттөн кийин ак түтүн булуттары көтөрүлө баштаганын тактады. Окуянын күбөлөрүнүн айтымында, кимдир бирөө баллон түрүндөгү күмүш нерсени ыргытып жиберген, андан кийин жарылуу болуп, түтүн чыккан.
Жарылуу Кисида менен Либерал-демократиялык партиянын талапкеринин сүйлөшүүсү учурунда болгон. Андан соң премьер-министр балык уулоо портундагы кайрылуусун токтоткон.
Окуя боюнча укук коргоо органдары иликтөө иштерин баштады.
Эске салсак, 2022-жылдын 8-июлунда Япониянын мурдагы премьер-министри Синдзо Абэ Нара шаарында Либералдык-демократиялык партияны колдоо боюнча сөз сүйлөгөн. Япониянын өзүн-өзү коргоо күчтөрүнүн мурдагы морягы, 42 жаштагы Тецуя Ямагами аны эки жолу атып, Абэ көкүрөгүнөн жана моюнунан жарадар болгон. Дароо ооруканага жеткирилген, бирок аны сактап калууга мүмкүн болгон эмес. Ямагами киши өлтүрүү боюнча күнөөсүн мойнуна алган. Абэ 2006-2007 жана 2012-2020-жылдары Япониянын өкмөтүн башкарган.
Адегенде Ямагами премьер-министрди анын саясатына нааразы болгондугу үчүн өлтүргүсү келгенин билдирген. Кийинчерээк ал Абэнин апасы ири секта менен байланышы бар деп эсептегендиктен өлтүрүү аракетин жасаганын айткан.
