Эрдоган кыргызстандык куткаруучуну медаль, элчини грамота менен сыйлады
Түркиянын президенти Режеп Тайип Эрдоган жер титирөөнүн кесепеттерин жоюуга тартылган куткаруучуларга мамлекеттик сыйлыктарды тапшырды. Сыйлык алгандардын катарында Кыргызстандын Түркия мамлекетиндеги элчиси Руслан Казакбаев жана ӨКМнын улук лейтенанты Темирлан Жумамүдүнов бар.
Өзгөчө кырдаалдар министрлигинен маалымдашкандай, 25-апрелде Түркиянын Анкара шаарында жер титирөөлөрдөн улам куткаруу иштеринде жана кырсыктын кесепеттерин жоюуда олуттуу жардам көрсөткөн чет өлкөлүк издөө-куткаруу топторуна жана дипломаттарга мамлекеттик сыйлыктарды тапшыруу аземи болду.
Сыйлоо аземине өзгөчө кырдаалдар министри Бообек Ажикеев жана министрдин биринчи орун басары Азамат Мамбетов да катышты.
Белгилей кетсек, кыргызстандык куткаруучулар Түркиянын Кахранманмараш жана Хатай шаарларында издөө-куткаруу иштерине катышкан. Алар урандылардын арасынан 8 адамды аман-эсен куткарып, 198 адамдын сөөгүн чыгарышкан.
Мындан тышкары Кыргызстан жабыркагандарга алгачкы медициналык жардам көрсөтүү үчүн талаа ооруканасын, ошондой эле Кахранманмараш шаарында боз үй шаарчасын тапшырган.
