Мадумаров: Бүт жерде баңгизаттын жарнамасы. Жарнак илинген жайлар жоопкерчилик тартсын!
Бүгүн, 24-майда Жогорку Кеңештин жыйынында депутат Адахан Мадумаров Бишкектин көчөлөрүнө баңгизаттын жарнагы толуп кеткенин айтты.
Анын айтымында, каякты караба: көчө кесилиштери, үйлөр, дарбазалар, короолор, электр панелдери – бардык жерде баңгизаттардын жарнактары.
"Ички иштер министрлиги, шаар бийлиги каякты карап жатат? Кайда барба, бардык жерде "гашиш-машиш", дареги жазылган мефедрон", - деп белгиледи депутат.
Ички иштер министринин орун басары Нурбек Абдиев бул маселе боюнча башкармалык мэрия менен тынымсыз иш алып барып жатканын айтты.
"Бул жазууларды ким калтырып кеткенин чогуу аныктап, өчүрүп жатабыз. Алар баңгизаттарды таратуунун ар кандай жолдорун ойлоп табышат экен. Алардын үстүнөн да иштеп жатабыз", - деп кошумчалады чиновник.
Мадумаров мындай жарнактар илинген объектилердин ээлерин жоопкерчиликке тартууну сунуштады.
"Мындай жарнактар коюлган объектилердин ээлерин жоопкерчиликке тартуу керек. Андан кийин эч кандай жарнама болбойт. Бул күрөштүн өтө жөнөкөй, кыска жолу, чыгымды талап кылбайт", - деди ал.
Абдиев Ички иштер министрлиги Мадумаровдун сунушун эске аларын билдирди.
