Өлкөдө гепатит менен ооругандардын саны эселеди. Адистерди тынчсыздандырган процедуралар
Кыргызстанда вирустук гепатит менен ооругандардын саны эки эсеге көбөйдү. Бул тууралуу бүгүн, 1-июнда Республикалык кан менен контакттуу вирустук гепатит жана ВИЧ инфекциясын көзөмөлдөө борборунун директору Үмүткан Чокморова билдирди.
Адис белгилегендей, төрт айдын ичинде борбордо 5 миңдей адам сарыктын В түрү менен, 3 миңге жакыны С түрү менен ооруганы аныкталган. "Ооругандардын саны эки эсеге көбөйдү, бирок бул башталышы гана. Көпчүлүгү ооруп жатканын да билишпейт", - деди Чокморова.
Саламаттыкты сактоо министрлигинин коомдук саламаттыкты сактоо, медициналык жана фармацевтикалык кызматты лицензиялоо башкармалыгынын башкы адиси Анара Мамбетисаева белгилегендей, вирустук гепатит бир нече жол менен жугат: парентералдык (кан аркылуу), вертикалдык (энеден балага) жана жыныстык жол менен.
"Парентералдык жугузууга ар кандай процедуралар кирет. Азыр өзгөчө биздин республикада кызматтар кеңири жайылган: тырмак, маникюр, педикюр, татуировка... Ошондой эле косметикалык процедуралар да бар...", - деп түшүндүрдү адис.
Мамбетисаева сарыктын оорусунун В жана С түрлөрү (акыркысы "жумшак өлтүргүч" деп аталат) симптомсуз болгондуктан коркунучтуу экенин баса белгиледи. "Инкубациялык мезгили узак - инфекция жуккан учурдан тартып оорунун күчөшүнө чейин. Бул вирустун адамдын организмине канчалык киргенине жана кандай иммунитетке ээ болгонуна жараша болот. Орто эсеп менен инкубациялык мезгил алты айга чейин жетет", - деп белгиледи. Адисттин айтымында, гепатит циррозго жана боордун рагына алып келет.
Бүгүнкү күндө мен санап өткөн кызматтар: маникюр, педикюр, косметикалык процедуралар, татуировка, көзөмөлсүз жана лицензиясыз аткарылып жаткан кызматтар бизди тынчсыздандырууда.
Үмүткан Чокморова кошумчалагандай, вирустук гепатитке текшерүүдөн өтүүнү каалаган ар бир адам жашаган жери боюнча үй-бүлөлүк медицина борборлоруна кайрылса болот. Анын айтымында, эмдөө жана дарылоо да ошол жерден жүргүзүлөт.
Башкы беттеги сүрөт иллюстрациялык.
