Аламүдүн дарыясында суунун көлөмү нормадан 3-4 эсе азайды
Аламүдүн дарыясында суунун көлөмү нормадан үч-төрт эсе азайды. Бул туурасында Айыл чарба министрлиги маалымдады.
Белгилей кетсек, Бишкек шаары жана Арашан, Таш-Мойнок, Кара-Жыгач, Лебединовка, Көк-Жар айыл өкмөттөрүнүн сугат жана таза суусу Аламүдүн дарыясынан көз каранды.
Аталган дарыя 7690 гектар жер аянтын сугат суу менен камсыз кылат.
"Апрель-май айларында түнкүсүн абанын температурасы төмөн болгондугуна байланыштуу суунун агымы нормадан үч-төрт эсе аз болуп тартыштык жаралган", - деп айтылат маалыматта.
Андыктан сугат суу кезек менен ар бир айыл өкмөткө эки күндөн берилип жатат.
"Акыркы эки-үч күндө абанын температурасынын жогорулашына байланыштуу суунун деңгээли көтөрүлө баштады, бирок дагы эле жетишсиз", - деп билдиришти министрликтен.
Эске салсак, буга чейин Бишкек мэриясы ичүүчү суунун тартыштыгынан улам сууну көп сарптаган менчик мончолор, унаа жуучу жайлар, бассейндер убактылуу жабылып жатканын маалымдаган.
