Садыр Жапаров: Кимдир бирөө агрессия көрсөтсө унчукпай карап отурбайбыз, жооп беребиз
Бүгүн, 13-июнда мамлекеттик резиденцияда президент Садыр Жапаровдун төрагалыгы алдында Коопсуздук кеңешинин жыйыны өтүүдө.
Анын айтымында, өлкө жетекчилиги өлкөнүн коргонуу жөндөмдүүлүгүн мындан ары да чыңдоого ниеттенүүдө. Бирок, президент белгилегендей, Кыргызстан тынчтыкты сүйгөн өлкө жана эч бир мамлекетке кол салуу максатын көздөбөйт.
"Кандай гана чыр-чатактар чыкпасын дипломатиялык жол менен анын алдын алууга же чечүүгө болот деп эсептейм. Биз өлкөнүн ички жана тышкы саясатында дал ушул принципти карманабыз. Бирок ошол эле учурда кимдир бирөө бизге агрессия көрсөтсө - анын кесепетинен жарандарыбыз, инфраструктура бузулуп жатат, унчукпай эле тура бербейбиз, биз тийиштүү жооп берүүгө даярбыз", - деди президент.
Коопсуздук кеңешинин жыйынында Кыргыз Республикасынын Куралдуу Күчтөрүнүн абалы жана өнүгүү багыттары жөнүндө маселелер, Кыргыз Республикасынын стратегиялык объектилеринин тизмеси боюнча сунуштар каралууда.
