Мыйзамсыз берилген дипломдун айынан дагы бир депутат мандатынан ажырады
Жогорку Кеңештин "Альянс" фракциясынын депутаты Фарходбек Алимжанов дагы мандатынан ажыратылды. Мындай чечим Шайлоо жана референдум өткөрүү боюнча борбордук шайлоо комиссиясынын жыйынында кабыл алынды.
Билим берүү министринин орун басары Уланбек Усековдун баяндамасынан белгилүү болгондой, Алимжанов университетте бүтүрүү экзаменине өзү катышкан эмес. Бул учурда ал чет өлкөдө болгон, бирок жыйынтыктоочу бааларды алган. Усековдун айтымында, Ош университетинин окутуучулары шалаакылык көрсөтүшкөн.
Алимжанов өзү ОшМУнун экономика факультетин бүтүрүп, 2016-жылы бакалавр даражасын алганын билдирди. Ал ошондой эле 2018-жылы Кыргыз Республикасынын Президентине караштуу Мамлекеттик башкаруу академиясынын "Мамлекеттик жана муниципалдык башкаруу" багыты боюнча магистратураны аяктаганын айтты.
Билим берүү министрлиги экзамендердин жыйынтыгын жокко чыгарууну, Фарходбек Алимжановдун ОшМУда алган дипломун, Кыргызстандын Президентинин алдындагы Башкаруу академиясында алган магистратуралык даражадагы дипломун чакыртып алууну сунуштоодо.
ОшМУнун окутуучуларына карата Билим берүү министрлиги текшерүү жүргүзүп, административдик жоопкерчиликке тартууну сунуштайт.
"Альянс" фракциясы бул окуя боюнча комментарий бере элек. Депутаттар чогулуп, окуянын чоо-жайын чечүүнү пландап жатышат.
Алимжанов өзү да комментарий берүүдөн баш тартууда.
Эске салсак, УКМК 2021-2022-жылдары Жогорку Кеңештин депутаттарынын жасалма дипломдору бар экенин билдирген. Кеп "Альянс" фракциясынан депутат Фарходбек Алимжанов менен "Ата Журт Кыргызстан" фракциясынан депутат Фархат Исмаиловдун дипломдору тууралуу болуп жатат.
Талаптарга ылайык, "Шайлоо жөнүндө" Кыргыз Республикасынын Конституциялык мыйзамынын 59-беренесине ылайык, "25 жашка толгон, шайлоо укугуна ээ жана жогорку кесиптик билими бар Кыргыз Республикасынын жараны Жогорку Кеңештин депутаты болуп шайланышы керек".
