Оштогу ат майданда тополоң: Садыр Жапаров финалдан кийин элдин нааразычылыгын көрдүбү?

Бүгүн, 31-августта Садыр Жапаров Ош шаарында массалык мушташ менен аяктаган президенттин көк-бөрү кубогунун ардактуу көрүүчүсү болду.

Кубок "Төлөйкан" ат майданында өтүп, Кыргызстандын эгемендүүлүгүнүн 32 жылдыгына карата уюштурулду. Финалга "Достук" (Ош) жана "Ынтымак" (Талас) командалары чыкты. Оюндун жыйынтыгында жеңиш "Ынтымак" командасына ыйгарылып, жергиликтүү көрүүчүлөр калыстарга нааразы болушту. Жыйынтыгында массалык түрдө талаага чуркап чыгышты. Айрым маалыматтарга караганда калыс сабалган. Кийинчерээк социалдык тармактарда милиция кызматкерлери калысты курчоого алып талаадан алып чыгып жаткан видео пайда болду.

Социалдык тармактарда президент Садыр Жапаров менен башкы прокурор Курманкул Зулушев ылдый жакта эмне болуп жатканын көрүп турган видео да тарады. Анда адамдардын үнү угулат, бирок алар эмнени так карап жатканы белгисиз.

Президенттик аппараттын пресс-релизинде Садыр Жапаров "Достук" жана "Ынтымак" командаларынын көк бөрү боюнча Кыргызстандын президентинин Кубогунун финалын көргөнү, бирок оюн талаасындагы баш аламандыкка күбө болгон-болбогонун так айткан эмес.