Ырчы Алихан менен апасы акталды
Октябрь райондук соту ырчы Алихан менен апасы Бактыгүл Сейитбекованын ишине чекит койду. Бул туурасында жактоочу Жанатбек Гульжигитов Kaktus.kg редакциясына билдирди.
Айтымында, эне, балага 209-берененин 3-4-бөлүктөрү ("Ири өлчөмдөгү алдамчылык") менен иш ачылган.
"Сот ырчыны толугу менен актады. Ал эми апасы Бактыгүл Сейитбекованы актап, 50 миң сом айыпка жыкты. Бул жарандык ишти тааныш-билиш аркылуу кылмыш ишине айландырышкан. Бирок сот тарабынан адилетүү өкүм чыкты", - дейт адвокат.
Эске салсак, 2022-жылы октябрь айында Кыргыз Республикасынын Эл артисти Роза Аманованын арызынын негизинде Бактыгүл Сейитбекова жана Алихан (Кубаныч Кылданов) 2 айга СИЗОго киргизилген.
2023-жылы январь айында Алихан, февраль айында апасы үй камагына чыгышкан.
Кийинчерээк Токтогулдагы мал базар талашка түшүп, Роза Аманова ырчы менен апасынын үстүнөн арызданганы маалым болгон.
