Себепсиз. Улуттук кардиология жана терапия борборунун жетекчиси Сарыбаев кызматтан алынды
Бүгүн, 30-ноябрда саламаттыкты сактоо министри Алымкадыр Бейшеналиев Улуттук кардиология жана терапия борборунун жамаатына жаңы жетекчи Медет Бейшенкуловду таныштырды. Бул тууралуу Саламаттыкты сактоо министрлиги билдирди.
Маалыматка ылайык, буга чейин кызматты аркалап келген Акпай Сарыбаев жумушунан бошотулган.
Кызматтан алынышы боюнча Сарыбаев өзү Kaktus.media сайтына комментарий берди. Анын айтымында министр борборго келип, бошотуу буйругун окуп, жамаатка жаңы м.а.ны тааныштырган.
"Себебин түшүндүргөн жок, жөн эле кетип калды", - деп, чындыгында ички аудит болуп, анын жыйынтыгы менен бүтүндөй команда, анын ичинде борбордун жетекчиси да макул болгон эмес, деп кошумчалады.
Сарыбаевдин айтымында, аны кызматтан бошотууга аудитордук корутундунун жыйынтыгы негиз болгон: "Кемчиликтер болгон, биз аларды жойдук, бирок ага карабай министр кызматтан алуу боюнча сунуш жазды.
Атын атагысы келбеген дарыгерлердин бири министр көптөн бери Сарыбаевди кызматтан алууну көздөп, жөн гана шылтоо издеп жүргөнүн белгиледи.
Белгилей кетсек, Бейшенкулов буга чейин аталган борбордо тез жардам кардиология жана реанимация бөлүмүнүн башчысы болуп иштеген.
