Бабанов үчүн Казакстанга барды делген экс-депутат элчи болушу мүмкүн
Президент Садыр Жапаров Ибрагим Жунусовду Кыргызстандын Өзбекстандагы элчиси кызматынан бошотту.
Ошол эле учурда алар бул кызматка кимди дайындоону пландап жатканы белгилүү болду. Жогорку Кеңештин Эл аралык иштер, коргоо жана коопсуздук боюнча комитетинин мүчөсү Мамасадык Бакировдун айтымында, өткөн аптада комитетте Өзбекстандагы элчилик кызматына Жогорку Кеңештин мурдагы депутаты Фархат Иминовдун талапкерлигин жактыруу маселеси көтөрүлгөн. Бирок маселе күн тартибинен алынып салынды.
"Бүгүн комитеттин тогуз мүчөсү добуш берүү жолу менен чечим кабыл алып, уруксат бергени белгилүү болду. Бирок бул мыйзамсыз. Бул талапкер, ким, кайда, кандай иш козголгон, кайда жүргөнүн, жашырынганын баарыңар билесиңер. Бул чечим Тышкы иштер министрлигине жөнөтүлүшү керек" , - деди Бакиров ЖК жыйынында.
Маалыматка караганда, бул талапкер боюнча атайын кызматтын терс корутундусу чыккан. Бирок ага карабастан, Иминов сурамжылоодон өткөн.
Эске салсак, Борбордук шайлоо комиссиясы 2018-жылдын 3-февралындагы жыйынында "Республика-Ата Журт" партиясынын атынан чыккан Фархат Иминовдун депутаттык ыйгарым укуктарын мөөнөтүнөн мурда токтотуу чечимин кабыл алган. Ал мандатын өз ыктыяры менен тапшыруу боюнча арыздарды жазган.
Белгилей кетсек, шайлоо алдындагы үгүт маалында президенттикке талапкер Өмүрбек Бабановдун каршылаштары Иминов Казакстандын жогорку бийлик өкүлдөрү менен сүйлөшүү үчүн Алматыга кетип, Кыргызстанда элдик толкундоолор үчүн чек араларды жабууну суранган деп айыпташкан.
Кийинчерээк Иминов бул билдирүүлөрдү "калп жана провокация" деп атаган.
