Коопсуздук кеңешинин катчысы: Биз агрессияга даярданып жатышканын билгенбиз
Кыргызстандын чек арачылары Тажикстан тараптан чагымчыл даярдыктар жүрүп жатканын кабарлаган. Бул тууралуу Кыргызстандын Коопсуздук кеңешинин катчысы Марат Иманкулов маалымат жыйынында билдирди.
"Куралдуу кагылышуудан тилекке каршы, аскерлер менен карапайым калк арасында жоготуулар бар. Каза болгондордун жакындарына терең кайгыруу менен көңүл айтам. Бул кагылышуу акыркысы болушун каалайт элем", - деди ал.
Иманкулов жаңжалдан эки-үч күн мурда кыргызстандын чек арачылары тажик тарапка такталбаган жерлерге кирбөөнү эскерткенин белгиледи.
"Эскертүүлөргө карабай, алар ал жакка кирип, ок чыгара башташкан. Бир аз убакыт өткөндөн кийин тажик тарап миномётторду колдонуп, өрт башка аймактарга да жайылды. Жаңжал башка жакта болуп жатса, алар башка аймактарды аткылап жатышты. Ага чейин биздин чек арачылар чагымчыл даярдык жүрүп, окоптор казылып жатканын кабарлашкан. Биз агрессияга даярданып жатканын билгенбиз", - дейт.
