Алтын рудасын жана концентратын өлкөдөн сыртка ташып чыгууга тыюу салынат

2023-жылдын 1-майынан тартып Кыргызстандан алтын камтыган руда жана алтын камтыган концентраттарын экспорттоого убактылуу тыюу салынат. Тиешелүү жарлыкка Садыр Жапаров кол койгонун президенттин администрациясынан кабарлашты.

Маалыматта кийинки жылдын 1-майынан тартып Кыргызстандын аймагында казып алынган жана өндүрүлгөн алтын камтыган руданы жана алтын камтыган концентратты (ЕАЭБ ТЭИ ТН 2616 90 000 0 коду менен классификацияланган) экспорттоого алты айлык мөөнөткө убактылуу тыюу салынары айтылат. Жарлыктын негизинде:

• "Кара-Балта тоо-кен комбинаты" ачык акционердик коомуна Кыргызстандын аймагында казып алынган жана өндүрүлгөн алтын камтыган руданы жана алтын камтыган концентратты кайра иштетүүгө өзгөчө укук берилүүдө.
• Мамлекеттик бажы кызматы жана Чек ара кызматы ушул жарлыкта көрсөтүлгөн товарларды мыйзамсыз ташып чыгарууга бөгөт коюуга багытталган зарыл чараларды көрүү тапшырылды.
• Министрлер кабинетине белгиленген тартипте убактылуу тыюу салууну 2023-жылдын 1-ноябрынан тартып ар бир алты айда узартып туруу тапшырылды.