"Тешик бар". Дастан Бекешев министрлер кабинети үнөмдөөгө өткөнүн айтат
Жогорку Кеңештин депутаты Дастан Бекешев жыл аягында республикалык бюджетте маселе жараларын Telegram-каналына жазып чыкты. Ал министрлер кабинети үнөмдөөгө өтөрүн, бардык курулуш иштери токтотулуп, кийинки жылы улантыларын белгиледи.
Эл өкүлүнүн айтымында, мындай маселе Тажикстандын куралдуу агрессиясынын кесепетинен келип чыкты.
"2022-жылы бюджет маселеси бир аз кайгылуу аяктайт. Тешик бар. Акыркы эки айда үнөмдөө режими болот, анткени Тажикстан менен болгон чыр-чатактардан улам биз көп чыгымга учурадык. Бул абдан катуу таасир берди. Менимче, бизде эле эмес Тажикстанда да бюджетте олуттуу жоготуулар болуп жатат. Анткени, коргонууга, калыбына келтирүүгө көп каражат жумшалат. Ошондуктан бул эки айда министрлер кабинети үнөмдөө режиминде болот, акчаны ары-бери чачпайт. Мурда курулуп баштаган мектептер, жолдор жана ооруканалардын курулушун 2023-жылы улантууну убада кылууда", - деди депутат.
Белгилесек, буга чейин Каржы министрлиги Баткен, Ош облустарындагы кыйроолорду калыбына келтирүүгө республикалык бюджеттен 3 миллиард сом бөлөрү кабарланган.
